BreakingNews : ಕೆಂಪು ಕೋಟೆ ಬಳಿ ಕಾರು ಸ್ಫೋಟ ; ಶಂಕಿತ ಡಾ.ಮೊಹಮ್ಮದ್ ಉಮರ್ ಕಾರು ಚಾಲನೆ ಮಾಡಿದ ದೃಶ್ಯ ಸಿಸಿಟಿವಿಯಲ್ಲಿ ಸೆರೆ !

ಸೋಮವಾರ ರಾತ್ರಿ ದೆಹಲಿಯ ಕೆಂಪು ಕೋಟೆ ಸಮೀಪ ಸಂಭವಿಸಿದ ಭೀಕರ ಸ್ಫೋಟದಲ್ಲಿ ಎಂಟಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ಹಲವು ಮಂದಿ ಗಾಯಗೊಂಡಿದ್ದಾರೆ. ಸ್ಫೋಟಕ್ಕೆ ಬಳಸಲಾದ ಹುಂಡೈ ಐ20 ಕಾರನ್ನು ಶಂಕಿತ ವ್ಯಕ್ತಿ ಚಾಲನೆ ಮಾಡುತ್ತಿರುವ ಸಿಸಿಟಿವಿ ದೃಶ್ಯಾವಳಿಗಳು ಹೊರಬಂದಿವೆ.

ಪೊಲೀಸ್ ಮೂಲಗಳ ಪ್ರಕಾರ, ಫರಿದಾಬಾದ್ ಭಯೋತ್ಪಾದಕ ಘಟಕಕ್ಕೆ ಸಂಬಂಧವಿಟ್ಟಿದ್ದ ಹಾಗೂ ಹಲವು ಪ್ರಕರಣಗಳಲ್ಲಿ ತಲೆಮರೆಸಿಕೊಂಡಿದ್ದ ಡಾ. ಮೊಹಮ್ಮದ್ ಉಮರ್ ಕಾರನ್ನು ಚಾಲನೆ ಮಾಡುತ್ತಿರುವುದು ದೃಶ್ಯಗಳಲ್ಲಿ ಕಾಣಿಸಿದೆ. ಸೋಮವಾರ ಬೆಳಗ್ಗೆ ಫರಿದಾಬಾದ್‌ನಲ್ಲಿ ಬಂಧನಕ್ಕೆ ಭೀತಿ ಪಟ್ಟು ಉಮರ್ ಇಬ್ಬರು ಸಹಚರರೊಂದಿಗೆ ಕಾರಿನಲ್ಲಿ ತೆರಳಿದ್ದಾನೆ ಎಂದು ತನಿಖಾಧಿಕಾರಿಗಳು ಹೇಳಿದ್ದಾರೆ.

ಉಮರ್ ತನ್ನ ತಂಡದೊಂದಿಗೆ ಕಾರಿನೊಳಗೆ ಡಿಟೋನೇಟರ್ ಅಳವಡಿಸಿ ದಾಳಿಯನ್ನು ಯೋಜಿಸಿದ್ದಾನೆ ಎನ್ನಲಾಗಿದೆ. ಸಂಜೆಯ ವೇಳೆ ಕೆಂಪು ಕೋಟೆ ಪ್ರದೇಶ ಪ್ರವಾಸಿಗರು ಹಾಗೂ ಸಾರ್ವಜನಿಕರಿಂದ ತುಂಬಿದ್ದ ಸಮಯದಲ್ಲಿ ನಡೆದ ಈ ಹೆಚ್ಚಿನ ತೀವ್ರತೆಯ ಸ್ಫೋಟಕ್ಕೆ ಅಮೋನಿಯಂ ನೈಟ್ರೇಟ್–ಇಂಧನ ತೈಲ ಮಿಶ್ರಣ ಬಳಸಲಾಗಿದೆ ಎಂದು ಪೊಲೀಸರು ದೃಢಪಡಿಸಿದ್ದಾರೆ.

ಸಿಸಿಟಿವಿ ದೃಶ್ಯಾವಳಿಗಳ ಪ್ರಕಾರ, ಕಾರು ಮಧ್ಯಾಹ್ನ 3.19ಕ್ಕೆ ಸುನೇಹಿ ಮಸೀದಿ ಸಮೀಪದ ಪಾರ್ಕಿಂಗ್ ಸ್ಥಳಕ್ಕೆ ಪ್ರವೇಶಿಸಿದ್ದು, ಸುಮಾರು ಮೂರು ಗಂಟೆಗಳ ಕಾಲ ನಿಲ್ಲಿಸಿ ಸಂಜೆ 6.48ಕ್ಕೆ ಹೊರಟಿದೆ. ನಾಲ್ಕು ನಿಮಿಷಗಳ ಬಳಿಕ ಅಂದರೆ 6.52ಕ್ಕೆ ಭಾರೀ ಸ್ಫೋಟ ಸಂಭವಿಸಿದೆ.

ಸ್ಫೋಟಕ್ಕೂ ಮುನ್ನ ಹಾಗೂ ನಂತರ ಕಾರಿನ ಚಲನವಲನ ಪತ್ತೆಹಚ್ಚಲು ಹತ್ತಿರದ ಟೋಲ್ ಪ್ಲಾಜಾಗಳನ್ನು ಸೇರಿಸಿ 100 ಕ್ಕೂ ಹೆಚ್ಚು ಸಿಸಿಟಿವಿ ದೃಶ್ಯಾವಳಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ.

ಘಟನಾ ಸ್ಥಳದಲ್ಲಿ ಪತ್ತೆಯಾದ ಎಂಟು ಶವಗಳಲ್ಲಿ ಇಬ್ಬರ ಗುರುತು ಮಾತ್ರ ಈವರೆಗೆ ಪತ್ತೆಯಾಗಿದ್ದು, ಉಳಿದ ಆರು ಮಂದಿಯ ಪರಿಚಯ ಇನ್ನೂ ಸ್ಪಷ್ಟವಾಗಿಲ್ಲ.

ಬಂಧನದ ಬಳಿಕ ಸ್ಫೋಟ ?

ಹಿಂದಿನ ವಾರ ಜಮ್ಮು-ಕಾಶ್ಮೀರ, ಹರಿಯಾಣ ಮತ್ತು ಉತ್ತರ ಪ್ರದೇಶಗಳಲ್ಲಿ ಕಾರ್ಯಾಚರಣೆ ನಡೆಸಿದ ಪೊಲೀಸರು “ಡಾಕ್ಟರ್ ಟೆರರ್” ಎಂದು ಕರೆಯಲ್ಪಟ್ಟ ಉಗ್ರ ಜಾಲವನ್ನು ಭಗ್ನಗೊಳಿಸಿದ್ದರು. ಜೈಶ್-ಎ-ಮೊಹಮ್ಮದ್ ಹಾಗೂ ಐಸಿಸ್ ಅಂಗಸಂಸ್ಥೆಯಾದ ಅನ್ಸಾರ್ ಗಜ್ವತ್–ಉಲ್–ಹಿಂದ್ ಗೆ ಸೇರಿದ್ದ 8 ಮಂದಿಯನ್ನು, ಮೂವರು ವೈದ್ಯರು ಸೇರಿ, ಬಂಧಿಸಲಾಗಿತ್ತು. ಈ ಸಂದರ್ಭದಲ್ಲಿ 2,900 ಕೆಜಿ ಸ್ಫೋಟಕಗಳು ಹಾಗೂ ದೊಡ್ಡ ಪ್ರಮಾಣದ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿತ್ತು.